Gaur ireki da Ikusmira Berriak egonaldien hamargarren deialdia
Ikus-entzunezko proiektuak garatzeko programan izena emateko epea irailaren 1era arte dago zabalik
Edizio honetatik aurrera, Elías Querejeta Zine Eskolako (EQZE) ikasle ohi batek osatuko du, txandaka, hautaketa-batzordeko postuetako bat.
Donostia Zinemaldiak, Tabakalera-Kultura Garaikidearen Nazioarteko Zentroak eta Elías Querejeta Zine Eskolak (EQZE) antolatzen dute egonaldirako eta ikus-entzunezko proiektuak garatzeko Ikusmira Berriak programa, eta, gaurtik aurrera, abian da hamargarren deialdia.
Irailaren 1era arteko epea egongo da Euskadiko, Espainiako eta beste herrialde batzuetako zinema-proiektuak, Nest sailean parte hartutakoak eta EQZEko ikasleenak aurkezteko. Izen-ematea online egin behar da eta interesdunek sinopsia, tratamendua, asmo-gutuna eta biofilmografia dituen dosierra aurkeztu behar dute. Azaroan jakinaraziko dira bost kategoriatan hautatu diren lanak.
Zortzi asteko egonaldia bitan banatuko da: sei aste 2024ko martxoan eta apirilean proiektua Donostiako Tabakalera zentroan martxan jartzeko, eta beste bi asteak irailean Zinemaldian bertan, zuzendariek beraien proiektua, ordurako garatu samar izango dutena, zinema-industriako ordezkarien aurrean aurkezteko.
Maiatzetik irailera bitarte, zinemagileek beren proiektuetan lanean jarraituko dute, industriako profesionalen hautaketa-batzordearen aldetik online tutoretza jasotzen duten bitartean. Batzordea osatuko dute Olimpia Pont Cháfer aholkulariak, Javier Martín aholkulari eta Donostia Zinemaldiko hautaketa-batzordeko kideak eta EQZEren 2019-2020 ikasturtean Artxiboko graduondokoa ikasi zuen Flor Clérico ekoizleak. Edizio honetatik aurrera, batzordeko postuetako bat txandakakoa izango da eta eskolako ikasle ohi batentzat gordeko da. Modu horretan, Zinemaldiak, Tabakalerak eta EQZEk zentrotik igaro diren ikasleen esperientziari jarraipena ematearen aldeko apustua egin dute.
Gainera, hautatutako lan bakoitzak 5.000 euroko garapenerako laguntza jasoko du ekainean, zinemagileek egoitzako bi faseen artean lan egiten jarraitu ahal izateko. Azkenik, Elamedia Euskadi enpresak Postprodukzioko Elamedia Euskadi Saria emango dio hautatutako proiektuetako bati. Honako hauek barne hartzen ditu sariak: soinu- eta kolore-postprodukzioa, grafismo-lanak eta DCP masterra.
Aurtengo edizioa
Egun, Ikusmira Berriak programako bederatzigarren edizioan parte hartzen ari dira Sameh Alaa, María Alché, Maddi Barber, Naomi Pacifique, David Pérez Sañudo eta Hikaru Uwagawa. Martxoa eta apirila bitartean, sei astez, bere proiektuak garatzen hasi ziren Tabakalerako Artisten Gunean, eta irailean berriz ere itzuliko dira Donostiara, Zinemaldiko 71. edizioan parte hartzeko.
Azken urteotan, hainbat neurri ezarri ditu Ikusmira Berriak-ek proiektua indartzeko. Egoitza kopurua bostetik seira handitzeaz gain, online tutoretza bereziak eta pertsonalizatuak eskaintzen zaizkie egoiliarrei Laura Citarella, Alexandre Koberidze, Elena López Riera, Damien Manivel, Kleber Mendonça Filho eta Catarina Vasconcelos profesionalen eskutik. Horrela, Ikusmira Berriak programak talentu berrien bila jarraitzen du, mundu osoko zinemagileei laguntza emanez. Modu horretan, programak talentu berriak bilatzen jarraitzen du, mundu osoko zinemagileei laguntza emanez.
Programaren hazkundearekin batera, gero eta arrakasta handiagoa izan du programak. 2015. urtean lehen edizioa egin zenetik, Ikusmira Berriak programak 44 ikus-entzunezko proiektu garatzen lagundu du eta horietatik, 20 amaitu dituzte haien egileek. Gainera, 19 estreinatu dira eta ibilbide luzea egin dute nazioarteko hainbat zinema-jaialditan. Esate baterako, Quinzaine des Cinéastes-eko azken edizioetan Elena López Rieraren El agua eta Elena Martín Gimenoren Creatura aurkeztu dira; azken honek Europa Cinemas Award saria eskuratu zuen. 2022. urtean, Donostia Zinemaldiko Sail Ofizialean Mikel Gurrearen Suro eta Manuel Abramovichen Pornomelancolía estreinatu ziren. Azkenik, joan den urtarrilean Raven Jacksonen All Dirt Roads Taste of Salt filmak munduko estreinaldia izan zuen Sundanceko zinema-jaialdian eta Alberto Martín Menachoren Antier noche filmak Visions du Réel zinema-jaialdian lehiatu zen.
IZENA EMATEKO EPEMUGA: IRAILA 1
