Ikusmira Berriak programak bihar irekiko du bere egonaldien hamahirugarren deialdia
Ikus-entzunezko proiektuak garatzeko programan izena emateko epea irailaren 1era arte dago zabalik
Bihar, uztailak 1, hasiko da ikus-entzunezko proiektuak garatzeko Ikusmira Berriak egonaldi-programaren hamahirugarren deialdia. Programa Donostia Zinemaldiak, Tabakalera Kultura Garaikidearen Nazioarteko Zentroak eta Elías Querejeta Zine Eskolak (EQZE) antolatzen dute.
Euskal Herriko, Espainiako eta beste herrialde batzuetako zinemagileek ez ezik, Nest sailean parte hartu dutenek eta EQZEko ikasleek ere irailaren 1era arte aurkeztu ahal izango dituzte beren proiektuak. Izen-ematea online egin beharko da, eta urtarrilean jakingo da kategoria bakoitzean zer lan hautatu diren.
Egonaldiko zortzi asteak bi alditan banatzen dira. Alde batetik, 2027ko martxotik apirilera bitarteko sei asteetan, zinemagileek beren proiektuak abian jarri ahal izango dituzte Donostiako Tabakalerako Zinea eta Ikus-entzunezko Laborategian, Donostian. Hor, zinemagile bakoitzak batzorde adituaren aholkularitza jasoko du, baita diziplina anitzeko ikuspegi profesionaletik emandako tutoretzak ere. Proiektu bakoitzaren premia espezifikoen arabera, banakako saioak eta taldekoak emango dira; horretaz gain, EQZEko ikasketa-programa ere eskuragarri izango dute hautatuek. Bestalde, Zinemaldia egiten den bitartean, zuzendariak irailean bi astez itzuliko dira Donostiara, dagoeneko garatuago izango duten proiektua zinemaren industriako ordezkariei erakusteko.
Maiatzetik irailera bitarte, beren proiektuan lanean jarraitzen duten bitartean, zinemagile bakoitzak hainbat profesionalen tutoretza jasoko du online, eta laguntza ekonomiko bat emango zaie egonaldiaren bi zatien artean lanean jarraitzeko aukera izan dezaten.
Nazioarteko proiekzioa
Programaren lehen edizioa 2015ean izan zen, eta urte horretatik hasita, ikus-entzunezko 62 proiektu gauzatzen lagundu du; horietatik 28 nazioarteko zinema-jaialdietan estreinatu eta aurkeztu dira —batzuk saridun izan dira—, eta gainerako proiektuak garapen-fasean daude edo estreinatzeke. Azken egoera horretan daude, adibidez, zinemagile hauen filmak: Meritxell Colell (Lejos de los árboles / Far from Trees), Martina Juncadella (Adentro del ruido) edo Manuel Muñoz Rivas (Manantial).
Azken urteetan, Ikusmira Berriak programak nazioartean finkatzea lortu du, eta programa horretako proiektuek mundu osoko zinema-jaialdi askotan parte hartu dute. Iaz, Diego Céspedesek Cannesko zinema-jaialdiko Un Certain Regard saileko film onenaren saria irabazi zuen La misteriosa mirada del flamenco / The Mysterious Gaze of the Flamingo filmarekin, baita Gazteriaren Dama Saria ere, Donostia Zinemaldiko Horizontes Latinosetik igarotzean. Sail horretan bertan, Ana Cristina Barragánen Hiedra / The Ivy filmak Aipamen berezia jaso zuen, eta Orizzonti sailaren Gidoi onenaren saria ere eskuratu zuen Veneziako zinema-jaialdian. Jaume Claret Muxartek ere Italiako lehiaketan estreinatu zuen Estrany Riu / Strange River eta Ekarpen Artistiko Onenaren Urrezko Bisatoa eman zioten, Reykjavikeko zinema-jaialdian Film onenaren saria eskuratzeaz gain. Bestalde, Irati Gorostidi Agirretxek Donostia Zinemaldiko New Directors saileko epaimahaiaren Aipamen berezia jaso zuen Aro berria lanagatik, eta Arcoíris 82 erakusketa aurkeztu zuen Tabakaleran, pelikula filmatzean sortutako material argitaragabearekin.
