IKUSMIRA
- iz. jakin-mina, ikusteko gogoa/nahia, ezagutzeko gogoa/nahia
- iz. [ikuspegia] bista, ikuspegia
- izond. ikusmiratzailea; jakiteko eta ezagutzeko gogoa duena
Ikusmira Berriak zinegileentzako egonaldi-programa bat da, talentu emergentea eta ikus-entzunezko sorkuntza babesten eta bultzatzen dituena.
Egonaldiaren helburua proiektu zinematografikoak garatzeko espazioa, denbora, testuingurua eta baliabideak eskaintzea da. Programa 2015ean sortu zen, Donostia Zinemaldiaren eta Tabakaleraren arteko lankidetzatik eta, 2018tik, Elías Querejeta Zine Eskolak (EQZE) ere parte hartzen du.
Ikusmira Berriak-en esanahia ikuspuntu berriak edo begirada berriak da eta, izenak berak dioen bezala, helburu bikoitza du: talentu zinematografiko berriei laguntza integrala ematea eta narratiba eta ikuspuntu garaikide berriak bilatzea.
ESPAZIOA
Egonaldia Tabakaleraren eraikinean egingo da. Tabakalera proiektu aitzindari eta berritzailea da, munduan parekorik ez duena, eta kultura garaikidearen nazioarteko zentro bat (Tabakalerako kultur proiektua), nazioarteko zinemaldi bat (Donostia Zinemaldia), pentsamenduaren, ikerketaren, praktika esperimentalaren eta berrikuntza pedagogikoaren nazioarteko zentro bat (Elías Querejeta Zine Eskola) eta filmoteka nazional bat (Euskadiko Filmategia) biltzen ditu.
Eraikineko ekosistemak zinemaren iragana, oraina eta etorkizuna batzen ditu ikuspegi integral batetik, zinemagileen komunitateari lagunduz, urteetan zehar jardun profesionalaren ondorioz eskuratutako berariazko ezagutzak ematen dituzten erakundeek partekatutako proiektuen bidez.
Aukera-eremu dinamikoa eta zinemari eskainitakoa da, erakunde bakoitzak eskaintzen dituen baliabideen ugaritasunagatik eta kopuruagatik.
DENBORA
Zortzi asteko egonaldia, bi fasetan banatuta, zazpi hilabeteko laguntza-programa batekin (martxotik irailera).
Martxoa eta apirila.
1. faseaLehenengo fasean, sei astetan zehar, egonaldiak proiektu zinematografikoak garatzeko tresnak eskaintzen ditu. Zinemagile bakoitzari adituen batzordeak eta bere proiekturako izendatutako tutoreak laguntzen diote, eta diziplina anitzeko profesionalaren (zinemagileak, komisarioak, industriako profesionalak, etab.) ikuspegitik aztertu eta aholkuak ematen dizkiete. Banakako eta taldeko saioak, hautatutako proiektu bakoitzaren premia espezifikoekin bat datozenak, sorkuntza-prozesu desberdinak lantzeko.
Maiatzetik abuztura bitartean.
Online tutoretzak eta 10.000 euroko diru-laguntza hautatutako proiektu bakoitzerako.
Iraila.
2. faseaBigarren fasean, Donostia Zinemaldiarekin bat etorriz, zinemagileak itzuli egingo dira egonaldiko azken bi asteak osatzeko. Fase horretan, proiektuek Donostia Zinemaldiaren arlo profesionalean hartzen dute parte eta, produktorearekin batera, pitching formatuan (online) akreditatutako industriari aurkezten diote proiektua, networking jardunaldietan eta ekitaldietan parte hartzen dute, eta one-to-one hitzorduen agenda pertsonalizatua dute, beren proiektuetan parte hartzeko interesa duten profesionalekin.
TESTUINGURUA
Ikusmira Berriak Tabakalera eraikinean dauden hiru erakundek antolatzen dute: Donostia Zinemaldiak, Tabakalera Kultura Garaikidearen Nazioarteko Zentroak eta Elías Querejeta Zine Eskolak.
Erakunde horiek guztiek talentu zinematografikoari laguntzeko sistema integral bat eratzea dute xede: sistema hori ez da mugatzen proiektu bat ekoiztea eta agerian jartzea erraztera; aitzitik, zinemagileak denboran zehar modu iraunkorrean prestatu, lagundu eta babestu nahi ditu. Ikasgeletatik hasi eta filmak erakusteraino ematen den laguntza da eta, zinemagile berriak ezagutzera emateaz gain, karrera egiten eta zinema-arloan bizitza profesionala garatzen laguntzea xede duena.
